دارالعلوم فیض اکبری میں خوش آمدید

مغربی ہندوستان کے صوبۂ گجرات کے ساحلی علاقوں میں ایک مشہور علاقہ ’’کچھ‘‘ ہے ۔ اس کے معروف شہر بھوج سے تقریبا پچاس کیلو میٹر کے فاصلہ پر ایک بابرکت سرزمین ’’لونی شریف‘‘ ہے جہاں سلاسل اربعہ میں سے سلسلۂ نقشبندیہ مجددیہ کی ایک عظیم شاخ اور اس سلسلے کے مہر تاباں دو عظیم المرتبت شخصیت قدوۃ السالکین ،زبدۃ العارفین ،ناشر کلام رسول الحاج سید علی اکبر شاہ جیلانی علیہ الرحمہ اور تاجدار ولایت ، واقف اسرار حقیقت حضور محمود الاولیا الحاج سید محمود شاہ جیلانی علیہ الرحمہ کا آستانۂ مبارکہ ہے ؛جہاں صبح و شام سینکڑوں کی تعداد میں زائرین ،معتقدین ،مریدین ومتو سلین اپنی عقیدت و محبت کےتحفے و سوغات پیش کرکے اپنے دامن مراد کو بھر کر واپس جاتے ہیں ،ان معتبر و مقدس ہستیوں کا نسب نامہ چند پشتوں سے ہوتا ہوا حضور سیدنا سرکار غوث اعظم کے واسطے سے سرکار دوعالم ﷺ سے جا ملتا ہے۔
اسی آستانہ سے متصل حضور سید محمود شاہ جیلانی کی ناقابل فراموش خدمات ’’الجامعۃ الاکبریہ ‘‘المعروف ب دار العلوم فیض اکبری ،لونی شریف ہے جو تقریبا پچاس سالوں سے مختلف شعبوں پر مشتمل دینی و عصری تعلیم میں سرگرم عمل ہے اور اپنی اعلیٰ تعلیم و تربیت ،عمدہ نظم و نسق کی وجہ سے اپنی تمام تر کامیابیوں کے ساتھ ترقی کی جانب رواں دواں ہے ،جہاں سے ہزاروں کی تعداد میں علما،فضلا،حفاظ،قراء اور ائمہ فارغ ہوکر ہند و بیرون ہند میں دینی خدمات انجام دے رہے ہیں اور پیغام اکبری و فیضان محمودی کی خوشبوؤں سے لوگوں کے مشام جاں کو معطر کررہے ہیں۔دار العلوم فیض اکبری حکومت ہند کے قانونی ضوابط کے مطابق ایک رجسٹرڈ ادارہ ہے، جس کا رجسٹریشن نمبر ۱۰۷۹ہے۔
فی الوقت ادارۂ ہذا میں ہندوستان کے مختلف صوبوں کے چار سو طلبہ ،تقریبا تیس اساتذہ کی زیر نگرانی دینی و عصری تعلیم سے آراستہ ہورہے ہیں ،اس وقت دار العلوم کا تعلیمی و تربیتی و دعوتی نظام بہت ہی عمدہ طریقے سے شہزادۂ محمود الاولیا حضرت سید علی اکبر شاہ جیلانی (دوم) کی سربراہی میں چل رہا ہے۔